॥ লঙ্কেশ্বর রাবনকৃত শ্রীশিবস্তুতি ॥

শ্রীগণেশায় নমঃ ।
গলে কলিতকালিমঃ প্রকটিতেন্দুভালস্থলে বিনাটিতজটোত্করং রুচিরপাণিপাথোরুহে ।
উদঞ্চিতকপালকং জঘনসীম্নি সন্দর্শিতদ্বিপাজিনমনুক্ষণং কিমপি ধাম বন্দামহে ॥ ১॥

বৃষোপরি পরিস্ফুরদ্ধবলধামধামশ্রিয়াং কুবেরগিরিগৌরিমপ্রভবগর্বনির্বাসি তত্ ।
ক্বচিত্পুনরুমাকুচোপচিতকুঙ্কুমৈ রঞ্জিতং গজাজিনবিরাজিতং বৃজিনভঙ্গবীজং ভজে ॥ ২॥

উদিত্বরবিলোচনত্রয়বিসৃত্বরজ্যোতিষা কলাকরকলাকরব্যতিকরেণ চাহর্নিশম্ ।
বিকাসিতজটাটবীবিহরণোত্সবপ্রোল্লসত্তরামরতরঙ্গিণীতরলচূডমীডে মৃডম্ ॥ ৩॥

বিহায় কমলালয়াবিলসিতানি বিদ্যুন্নটীবিডম্বনপটূনি মে বিহরণং বিধত্তাং মনঃ ।
কপর্দিনি কুমুদ্বতীরমণখণ্ডচূডামণৌ কটীতটপটীভবত্করটিচর্মণি ব্রহ্মণি ॥ ৪॥

ভবদ্ভবনদেহলীবিকটতুণ্ডদণ্ডাহতিত্রুটন্মুকুটকোটিভির্মঘবদাদিভির্ভূয়তে ।
ব্রজেম ভবদন্তিকং প্রকৃতিমেত্য পৈশাচিকীং কিমিত্যমরসম্পদঃ প্রমথনাথ নাথামহে ॥ ৫॥

ত্বদর্চনপরায়ণপ্রমথকন্যকালুণ্ঠিতপ্রসূনসফলদ্রুমং কমপি শৈলমাশাস্মহে ।
অলং তটবিতর্দিকাশয়িতসিদ্ধিসীমন্তিনীপ্রকীর্ণসুমনোমনোরমণমেরুণামেরুণা ॥ ৬॥

ন জাতু হর য়াতু মে বিষয়দুর্বিলাসং মনোমনোভবকথাস্তু মে ন চ মনোরথাতিথ্যভূঃ ।
স্ফুরত্সুরতরঙ্গিণীতটকুটীরকোটৌ বসন্নয়ে শিব দিবানিশং তব ভবানি পূজাপরঃ ॥ ৭॥

বিভূষণসুরাপগাশুচিতরালবালাবলীবলদ্বহলসীকরপ্রকরসেকসংবর্ধিতা ।
মহেশ্বরসুরদ্রুমস্ফুরিতসজ্জটামঞ্জরী নমজ্জনফলপ্রদা মম নু হন্ত ভূয়াদিয়ম্ ॥ ৮॥

বহির্বিষয়সঙ্গতিপ্রতিনিবর্তিতাক্ষাবলেঃ সমাধিকলিতাত্মনঃ পশুপতেরশেষাত্মনঃ ।
শিরঃসুরসরিত্তটীকুটিলকল্পকল্পদ্রুমং নিশাকরকলামহং বটুবিমৃশ্যমানাং ভজে ॥ ৯॥

ত্বদীয়সুরবাহিনীবিমলবারিধারাবলজ্জটাগহনগাহিনী মতিরিয়ং মম ক্রামতু ।
উপোত্তমসরিত্তটীবিটপিতাটবী প্রোল্লসত্তপস্বিপরিষত্তুলামমলমল্লিকাভ প্রভো ॥ ১০॥

ইতি শ্রীলঙ্কেশ্বরবিরচিতা শিবস্তুতিঃ সমাপ্তা ॥